Uss subah bahot gunoodgi thee aankh khul hi nahee rahee thee, sir mein bhaaripan ki wajah yaad aayi,…. raat neend ki goli li thee………..
Halanki himmat nahee thee magar fone ki ghanti ne bistar se uthne ko majboor kar diya, .....kapre pahantey hue kal k waqyaat yaad aaney lagey aur sir me beinteha bojh mahsoos honey laga……..
Rawish k sath mein Azeem k ghar k liye nikal liya ………….Azeem aur Sabiha qareeb mein hi rehtey hain….dost hain aur un donon se zada hum log unke bachchon se milne unke ghar jaya kartey they ya unhe apne ghar bulaya kartey they...Azeem badey bhai ki tarah mujhey manta hai ………..likhne ka maqsad ye ki in logon se hamari kafi qurbat hai…………….
Azeem building k neechey hi mil gaya kuch aur log bhi they….mashwarey k baad main aur Azeem Shariq k saath Indian Embassy rawana ho gaye ........
Embassy ka raasta bahot lamba nahi hai lekin aaj bahot lamba lag raha tha…..neend ki dawa ka khumaar ab kam honey laga tha aur kal jo kuch hua uski tasweer nashtar ki tarah dimagh mein chubhne lagi… .............
Pichla din........baroz 4th April 2012..........
Dopahar taqreeban 1 bajey they, main agley din k stage show ki compeering k points likh raha tha jab Owais ka bahot hi badhawas sa fone aaya, usne ittela di k Azeem k betey ka severe accident hua hai aur wo log usey lekar Farwaniya hospital gaye hain….main furan hi boss ko ittela dekar daftar se nikal liya..raastey mein sameena ko fone kiya, halke se accident ki baat batayee aur saath chalne k liye tayyar rehne ko kaha..........khayal tha k Sabiha ke sath koi hona chahiye ..........
Sameena k saath Adiba bhi gaari mein baith rahee thee k Azeem k fone aaya aur usne wo declare kar diya jiska andaza ho chala tha...........Yousuf had died…………….
Hospital pahonch k maine Azeem ko liptaya aur wo betahasha roya shayd ab tak wo bilkul nahee roya tha…….…..….main bhi uske saath kuch ro liya……..jab hum kuch halke hue to usne jo bataya wo umr bhar k jiye wajood pe naqsh ho gaya……….
Aj unki beti Mehvish k school ka pehla din tha dono maa baap bahot khush they aur subah unhone beti ko rukhsat kartey hue dono bachchon ki khoob tasweerein utareen……..dopahar mein usi ko receive karne k liye bhi dono Yousuf ko lekar building k neechey aaye…… Jab bus ayee to Sabiha bus ki taraf barh gayee, Yuosuf Azeem k saath kuch qadam peechey tha…… ……….isi beech mein barabar k restaurant ki car mein gharon tak delivery pahunchane wala aadmi baitha aur usne bina peeche dekhe hi bahot raftaar mein car reverse kar di aur Yousuf k oopar charha di…… ………….taqreeban 2 saal ka halka sa jism bri tarah zakhmee ho gaya…….ya shayd fauran hi khatm ho gaya……………halanki Azeem ne bataya k hospital le jatey hue kuch sansey theen…….
Jis jis ko ye khabar mili fauran hi hospital aa gaya…..Ab Yousuf k aagey k safar k liye yahan k qanoon k mutabiq bahot si formalities poori karni theen…shuroo mein Sabiha ka kehna tha uski tadfeen India mein ho lekin mera thora sa hi samjhane par usne ye khayal tark kar diya……..Yahan k hospital aur police se pehli martaba itna qareebi sabqa hua ..yun to aksar-o-beshtar hum log drawing room discussions mein apne sath honey wali zyadatiyon ka rona rona rotey hain lekin ab ye zyadatiyaan hamarey oopar beet rahee theen……hospital mein ek doctor se maine bahot ajizi se mayyat ko le jane ka procedure maloom karna chaha to usne bahot gussey mein jawab diya "I’m too busy to help u”…..
Khair is waqt tak bahot log aa gaye they.......... kaghzi kam Azeem k boss Bashar ne sambhal liya tha...... Sabiha , sameena aur Adiba ko Ikram k saath ghar bhej diya gaya.........ghar jatey hue Sabiha ne azeem ko zada cigarette na peene k liye kaha mujhey iska khayal rakhne k ishara kiya ……… mere andar k tootey hue hausley ne us Larki ko ek zabardast salam kiya jo is aazmaish ki ghadi mein bhi bahot composed thee…. …......
Is waqt dopahar ka koi 3 baja hoga ,mujhey khud ko kal k stage program se alag karna tha jiske liye maine Iqbal bhai ko fone kiya aur saari baat bata kar show “on” rakhne k liye kaha….........mera khayal tha k zaati tragedy ko doosron par kyun haavi kiya jaaye…..is show mein bahot se log involved they jinki mehnat aur paisa laga hua tha…………
Hospital se Azeem k saath zadatar log police station chaley gaye jahan aagey ki karyvahi honi thee ...main uske ghar aa gaya jahan khabar milne par log aaney shuroo ho gaye they...
Ab tak Sabiha khasi qaboo mein thee aur fones attend kar rahi thee…phir shayd uski ammi ka fone aaya aur jis saffak alfaz mein usne kaha "Ji Yousuf mar gara" ....wo jumla pighle seesey ki tarah kanon se meri rooh mein utar gaya …........ye kehne k baad maine uske roney ki awaz suni………….ispar thora itminaan hua kyunki suna hai k aisey halaat mein agar koi na roye to usko zabardasti rulaya jata hai…….warna shock se doosrey nuqsanaat ka khatsha rehta hai………………..
Yahan se police walon ki badsalooqiyon ka lamba silsila shuroo hua…..Taqreeban 3 ghantey ki likha parhat k baad azeem ko thaane se jane ki ijazat mili..... phir raat mein koi 8 bajey 2 police waley mauqey par tehqeeqat karne aaye…..inme se ek ka rawaiyya haiwanon wala tha………aisa lag hi nahee raha tha k wo kisi insaan ki maut ki tafteesh karna aaya ho……….balki aisa maloom hota tha jaisey usko zabardasti kisi mamooli lootmaar ki report banane bheja gaya ho……...usne ek do martaba Azeem ko bahot hiqarat se daanta…….us mazloom baap ko jisne abhi kuch ghantey pehle apna masoom beta khoya tha…. Is police waley ki shakl maine apne zehan mein naqsh kar li…………. hashr k maidan mein zarur isko apne rawaiyye ka hisaab chukana hoga….…..
Is mulk mein apni haisiyat hum sabko pata hai aur rozmarra ki zindigi mein hamein aksar hamari auqaat dikhayee jaati hai ….magar us din ye bahot saaf ho gaya k yahan hamari haisiyat kisi charind ya parind se zada nahee hai…………. jis restaurant ki car ne ye haadsa kiya tha wo badastoor khula raha… ….iske malik ya mulazimo ne ek minute k liye bhi apna dhandha band nahee kiya ……itna hi nahee…....wo hum logon par gurra bhi rahe they…..insan ka insan se ye salooq pehli martaba dekha………..is sab k duaran main soch raha tha k agar yehi kuch hamarey mulk mein hua hota to is hotel aur driver ka kya bana hota…………hamarey mulk mein agar dushman bhi marta hai to uska bhi afsoos zahir kiya jata hai…..
Raat mein 9 bajey Azeem ki bahen aur behnoi Sharjah se aa gaye to kuch rahat mehsoos huee...Sabiha kuch khul k royee..................
Waqt ka andaz nahee hua jab hum ghar aa gaye aur main neend ki dawa lekar so gaya…………….
Embassy k Mahavir Jayanti ki wajah se embassy band thi…….. lekin emergency staff ne mushkil se 30-40 minute mein aur bahot hamdardi k sath Yousuf ki tadfeen k liye no objection certificate de diya...........
ye kaghaz lekar hum wapas police thaney aaye jahan phir kuch likha parhat k baad mazeed ek kaghaz mila jisko lekar hum wahan chaley gaye jahan Yusuf ko hospital se muntaqil kar diya gaya tha...... yahan se jab usko ambulance mein rakh k qabrstan k liye bheja ja raha tha tab bhi main usey dekhne ki himmat nahi kar paya..........Azeem ne bahot azm se is kaam ko bhi anjaam diya aur ambulance hi mein baith k gaya ..........
Taqreeban 3 baj gaya tha.........ambulance k peechey zadatar log qabrstan chaley gaye, main aur Shariq , Azeem ki Bhateeji aur uske shohar ko airport receive karne chale gaye.......in donon ko lekar hum seedhey qabrstan pahunchey jahan ghusl ki tayyari ho rahi thee........
Ghusl dene se pehle Yousuf dekhne ki ijazat di gayee..........main bahar hi thehra raha..........Azeem sabiha k saath kuch aur log andar gaye.......lekin jab halaat beqaboo honey lagey to mujhey Azeem ko sambhalne k liye zabardasti andar bheja gaya...........
Maan Baap se aulaad ki aisi mulaqaaat ka manzar filmon mein aksar dekha tha....magar ye haqeeqi lamhat larger than life they….. .....in se guzarne ki shiddat ko sirf mahsoos kiya ja sakta hai , alfaaz mein kehna ya likhna na-mumkin hai…..wahan mojood har ba-aulaad insaan is haqeeqat se laraz raha tha k ye uske saath bhi ho sakta tha ya khuda na karey ho sakta hai........sab log apni apni mahdood aql se Khuda ki maslehat ko samjhne ki koshish kar rahey they aur insan ki bebasi ki haqeeqat ko samney dekh rahey they……Sabiha ne Yousuf ke barf sa thanda haath pakra hua tha aur Azeem usse is haadse k liye maafi maang raha tha………….kaheen na kaheen wo khud ko iska zimmedaar maan raha tha………….
kuch der baad Yousuf ko supurd-e-khaak kar diya gaya........mera Yaqeen hai k wo jannat k us maqaam par le jaya gaya hoga jahan Khuda ki Mahboob tareen makhlooq hogi…………….aur hamein bataya gaya hai k is qism ki maut shahadat k darje mein likhi jati hai hai aur har shaheed apne maa baap k saath 9 logon ko jannat mein le jane k haqdar hota hai…………….
jab hum wapas Azeem k ghar pahunchey to maghrib ka waqt ho chala tha...........kaafi log wahan they lihaza main aur Sameena ghar aa gaye.........meri shaam abhi baaqi thee......jis stage program ki tayyari pichle ek maheene se zor shor se chal rahi thee mujhey wo conduct karna tha ............der ho chuki thee……. call pe call a rahey they........
Tez garam paani se ghusl karke chai k saath do panadol khakar, achcha sa libaas pahan kar main program ki venue par pahunch gaya..........kaafi log aa chukey they.......screen par hamarey performing artist ki filmon aur TV ads ke manzar chal rahey they.........mahaul khushgawar tha….
Mujhey 9 bajey program shuroo karne ko kaha gaya...............theek 9 bajey main curtain k aagey podium pe aa gaya................tez spot lights mein neend aur thakan se bojhal aankhon ko khula rakhne aur muskurahat k saath apna khitaab shuroo karne mein kamyab hotey hue maine program shuroo kiya.....
“show was on”.............there were applauds here n there……I was faking smiles even though crying aloud from within………
Dil hee to hai na sang-o-KHisht dard se bhar na aaye kyoN ?
royeNge ham hazaar baar, koee hameiN sataaye kyoN ?
[ sang = stone, KHisht = brick ]
Qaid-e-hayaat-o-band-e-GHam asl meiN dono ek haiN
maut se pehle aadmee GHam se nijaat paaye kyoN ?
[ hayaat = life, band-e-Gham = conceled sorrows,
nijaat = release/liberation ]
