Bajjo

Bahot din pehley jab har itwaar ko TV par film dikhayee jatee thee hum log ibadatan 6 bajtey hi TV ke samney baith jatey they........ek baar M.S sathyu ki film Garam Hawa aa rahi thee aur mujhey yaad hai k is film ka mujhpar itna asar hua k mera chota sa zehan iski kahani ko lekar bahot din tak uljha raha.........iski qawwali “maula saleem chisti” mujhey ab bhi bahot achchi lagti hai aur main YouTube par isko yada kada sun leta hun.......is film k achcha lagne ka nafsiyati pehlu ye bhi tha k is film ki kahani ki tarah hi mulk ki taqseem ne hamarey khandaan ko bhi taqseem kar diya tha aur ye zakhm is hadsey  ke 66 saal baad bhi reh reh kar rista hai............university ki taleem ke dauraan  Manto ki kahani Toba Tek Singh par mabni dramey mein kam karna hua aur aapbeeti honey ki wajah se khud ko kahani ke kirdaaron se qareeb paaya aur play ki script parhtey hue ya rehearsals kartey hue main in budnaseeb logon ke dukh ko samjhtey hue aksar jazbati bhi ho jata tha...................................Munawwar Rana ki Mohajrnama sunkar ya TV par dekh kar bhi yehi kaifiyat hoti hai..............

 

Mohajir hain magar ek duniya chor aaye hain

Tumharey paas jitna hai hum utna chor aaye hain

Ab apni jaldbaazi par bahot afsoos hota hai

k ek kholi ki khatir rajwada chor aaye hain...................

 

Hindustan se hijrat karke jane waley becharey ab tak Mohajir hi kehlatey hain kyunki wahan k maqami logon ne unhe dil se kabhi qabool nahee kiya .......... Hamari sabse badee bahan “Bajjo ya Baji” bhi Mohajir hain jo sarhad paar Lahore mein rehti hain jiska Dilli se hawaii fasla sirf chalees minute ka hai magar nazaryati doori sadiyon ki hai aur jab kabhi is faasley ko taye karne ki zarurat pesh ayee to Pakistani sifaratkhaaney ke bahar visa k liye bhikhariyon ki manind line lagani padee ..........................suna hai udhar se aaney walon ki bhi aisi hi behurmati hoti hai.....

 

Bajjo Pakistan kab aur kyun gayeen hamein pata nahee, bachpan se unhe babuji ke kamrey mein tangee huee tasweer mein dekha aur bahot zamaaney tak unse iske alawa koi bhi talluq nahee raha. 1971 ji jung k baad donon mulkon ke darmiyan aana jana, khato kitabat, phones par pabandi thee lihaza agar wahan khat bhejney hotey they to wo kissi teesrey mulk hotey hue jatey they.....jo k aksar maheenon baad pahonchtey they............. Bajjo ke mutalliq mujhe apne bahot bachpan ki ek baat yaad hai........ek subah maine dekha ghar mein sab log jaldi jaldi khat likhne mein mashghool they......shayad kisi Arab mulk se hotey hue kisi ke haath bajjo ko khat bheja jana tha. Baji ki takeed thee ki unhe ghar ke har shakhs se alag alag khat chahiye hota tha chahey wo kuch linein hi kyun na hon ..............ghar se pahunchey in khutoot ko wo bar bar parhti theen aur kai din tak apne takiye ke neechey rakh kar soti theen, unke alfaaz mein “in khaton mein se mujhey ghar  ki khushbu atee hai”...................

 

1977 mein janta party hukumat ki pahal par sarhadein khul gayeen aur Hindustan Pakistan ke darmiyaan awajahi ki shuruaat ka ailaan ho gaya magar amal mein aatey aatey 1979 mein hamari pehli mulaqaat bajjo se ho payee............is waqt meri umr koi 9-10 ki rahi hogi. unsey is mulaqaat ya iske baad huee ginti ki 8-10 mulaqaton ka bayan karna utna hi mushkil hai jitna k inse guzarna hota hai..........dil halka karne k liye unhe roney diya jata hai ya sath mein ro liya jata hai.....hum sab chotey bhai bahanon ko wo betahasha niharti hain mano guzrey hue tamaam waqt ka hisaab poora kar lena chahti hon............kul mila kar hum sab par se jazbaat ka ek sailaab ho guzarta hai..............yehi nahee, wo ghar k daro deewar ko bosey deti hain.........pehli mulaqaat ke baad baaqi ki mulaqaaton mein jaanboojh kar main der se ghar aata taki sailaab apne urooj se guzar chuka ho.........................

 

1984 mein babuji kaafi beemar hue aur bahot dinon tak hospital mein rahey, baji ko is bina par visa mil gaya aur jab wo babuji se milne hospital pahuncheen, main wahan mojood tha……….baap beti k milaap ke is manzar ko bayan karna meri salahiyat se parey hai magar itna keh sakta hun k agar isey batwarey ke zimmedar siasatdanon ne dekha hota to shayad unke dil bhi pighal gaye hote………..kuch din rehne ke baad jab wo wapas jane lageen to rukhsat ke waqt baar baar babuji ke kamrey mein jateen aur unka hath apne hathon mein lekar baith jatee theen…… ye silsila kaafi der tak chalta raha………….shayad khud ko yaqeen dilana chahti theen ki  baap se ye unki aakhree mulaqaat nahee hai …………..

 

iske baad yaad nahee wo India kab ayeen, ek shaam khabar ayee, Basheer bhai yani unke shauhar ka inteqal ho gaya hai. Telephone ab bhi bahut aam nahee they aur telegrammes bhi aaney mein hafta bhar laga detey they lihaza ye khabar do teen jagah se hotey hue teen din baad hum tak pahunchee...............ghar mein sannata chaa gaya, babuji bahot khamosh ho gaye, amma ne bahaduri ka bahut dikhawa kiya magar unki ankhein zada saath nahee de paa rahee theen...............baar baar pursa deney aaye mehmanon k samne chalakti raheen.....................

 

Basheer bhai Pakistan hijrat ke baad achchey ohdey ke sarkari mulazim ho gaye aur phir kabhi bhi Hindustan nahee aa sakey....maine unko kabhi nahee dekha yahan tak ki  unki awaaz tak nahee sunee....sirf ek daur mein jab wo kuch baras mulazmat hi k silsiley mein Holland jakar rahey unse khoob khat-o-kitabat huee............mujhey likhey hue unke tamaam khutoot merey paas mahfooz hain..........ye us daur ki baat hai jismein kisi k paas jeans ka hona bahot badi cheez thee aur merey liye jab bhaisahab ne ek jeans bheji to maarey khushi k main deewana sa ho gaya............barsa baras pahanney ke baad jab wo zar zar ho gayee tab bhi maine usey phenkna gawara nahee kiya aur baksey mein rakhey raha..........

 

Bhaisahab k inteqal k fauran baad se hi ammi babuji k visa ki koshish shuru ho gayee aur 3 maheeney baad jab unko visa mila wo beti k paas pursey ko jaa sakey. shauhar k inteqal ke bahot arsey baad tak baji India nahee aa sakeen, 1998 mein bhai ki shadi mein shareek hone k liye hamney maheenon pehley se koshish shuru kar di aur duniya bhar ke affidavits jama karne par unko bilaakhir visa mil gaya aur wo  shadi mein shareek ho payeen.......... 1999 mein unhone apne do beton ki shadi karee aur ismen hum logon ki shirkat ka qissa dilchasp hai,...... baaji ki ye khwahish thee k ghar k zada se zada log is taqreeb mein shareek hon lekin ek saath itne visa milna namumkin tha magar Allah ne raasta bana diya .............. hua ye k ek hawaee safar k dauran hamari choti bahen ki mulaqaat Pakistan k safir ki beti se huee aur unmein dosti ho gayee, is dosti ki wajah se Pakistani sifaratkhane mein izzat se aao bhagat bhi huee aur 5 visa bhi issue ho gaye lihaza ammi babuji aur 3 bahnein is shaadi mein shareek ho sakey............ Kuwait mein Pakistani embassy ne meri visa application kharij kar di lekin maine safir sahab se mulaqaat karke ek haftey ka visa haasil kar liya aur ye hum sab bhai bahnon ki sabse yaadgar mulaqaat rahee..

 

Halaat se joojhne mein baji ek mazboot insaan saabit hueen, hum logon se bahot bahot arsey par milne k waqt jazbati hone ke alawa unhone apni zindgi ki jaddo jehad aur mahroomiyon ka zikr kabhi kisi se nahee kiya balki hum sab chotey bhai bahnon ko Khuda ki maslehat ka hawala detey hue halaat ko qabool karne ki himmat bandhayee hai….lekin Lahore se karachi  baraat ke safar ke dauran baji se meri khul kar guftgu huee aur  andaza hua wo bahar se kitni bhi mazboot deekhti hon andar se tanha hain……….shauhar ke inteqal aur maan baap se doori ne unhe kamzor kar diya tha ……..

 

Karachi mein  ek door ke rishtedar, Jamal bhai  se mulaqaat huee,  wo bahot der tak mera haath apne hathon mein lekar baithey rahe aur Hindustan mein apne tamaam rishtedaron ki babat fardan fardan malumaat ki  aur jab uthey to kaha “ Bhai Hijrat kiye yun to bahot arsa guzar gaya hai magar dil ab bhi unhee gali koochon mein khelta hai”…………..

 

Khayal aata hai aksar dhoop mein bahar nikaltey hi

hum apne gaanv mein peepal ka saaya chor aaye hain

wahan ki khaak bhi mumkin hai humse faasla rakhey

ki hum aatey hue uska bharosa tor aaye hain

 

2010 mein ammi ke intqal ke kai maheeney baad tak baji ko visa nahee mil paaya aur jab wo bahot bechain ho gayeen to unka beta unhe lekar Makkah Umrah karaney le aaya main bhi Kuwait se wahan pahonch gaya aur unko kuch taqweeyat mil gayee. 2012 mein babuji ke inteqaal par bhi unko teen maheeney baad visa mil paya wo bhi bahot saarey sarkari kagzaat  jama karne ke baad....... ab bhala hum kis se poochein  “baap ke death certificate se zada bada aur kaun sa kaghaz ek adad visa ke liye darkaar hai”.........in donon mulko ke talluqaat ab itne gal chukey hain ki kisi apsi bharosey ki gunjaish hi nahee bachtee.............

 

Baji ab boodhi ho chali hain aur unke liye Dilli – Lahore ka safar lamba ho gaya hai isliye mujhey lagta hai ab baaqi ki zindgi mein unse zada mulaqatein mumkin na ho payein. Main kyunki Kuwait mein rehta hun isliye unse aksar baat kar leta hun lekin Hindustan waley bhai bahan Pakistan fone karne ya wahan se aaye phone receive karne se dartey hain kyunki ye phones jaanch ke daaerey mein rehtey hain aur agar kisi ka waqt kharab hua to in phone records k zariye kisi ko kuch bhi saabit kiya ja sakta hai.......... haan emails aur facebook ne kuch rahat zarur di hai..........aamney saamney na sahi tasweeron se hi khair kahiriyat mil jati hai..........

 

Amma ke intqal k baad main babuji ko Kuwait le aaya tha aur ji tod koshish kar li k kissi tarah bajjo ko bhi bula lun taki hum sab log ek baar ji bhar k saath reh lein lekin Kuwait mein Pakistaniyon k visa band hain aur iske alawa main bataur Hindutani kisi Pakistani ko sponsor nahee kar sakta.

 

Dooriyon ka safar jaari hai

waqt ki qalam se zindgi ka farman abhi jari hai

tumhein yaad karna aur un yadon mein kho jana

laut kar aa jaao kaisey bhi bas yehi arman baaqi hai...